كُن مختلف ! 


السلام عليكم ..

تدوينه اليوم دايما كنت افكر فيها بيني وبين نفسي بعدين قلت خليني أكتب تدوينه عنها 

التدوينة هيا عبارة عن فكرة ( out of the box) 
يعني الخارج عن المألوف الشئ غير التقليدي المبتكر 


طبعا إحنا في مجتمعنا عندنا فكرة ( القطيع ) منتشرة وبقوة ، وأبداً ماعندنا مبداء إحترام  إختلاف الإهتمامات يعني لو سويت شيء هما يشوفوة تافهه يجلسوا يقولوا والله إنك فاضي تضيع وقتك في دا الشي!


تخيلوا مثلًا عند الأجانب في شخص كل شغفة وهمة يجلس أربعة ساعات في اليوم يصور حيوانات وهيا في يدة زي كذا 


ودي النتيجة 

لو كان عندنا كان لما جا يحط صورة في مواقع التواصل يجوة ناس يقولوا إقراء قرآن أبرك لك ، ولا يسألوا أيش بتستفيد في النهاية ؟ 


مايراعوا إختلاف العمر، التفكير ، البيئة


يمكن الشي إلي تشوفة تافه غيرك يشوفة مُلهم والعكس !

 لا تقلل من قيمة الأشياء إلي يحبها غيرك أو أنت تحبها حتى لو كانت سخيفة تافهه مدام إنت مبسوط فيها ومهي غلط ولا حرام ليش تحرم نفسك ؟ 


لا تقول ماعمروا أحد سواها قبلي كيف أنا أسويها مو لازم تكون تقليدي سوي إلى تبغاة أخرج عن المألوف جرب شيء ماعمرك جربتة تكلم مع ناس ماعمرك كلمتهم أُنظر للأشياء من زاوية جديدة خلي حياتك كلها تجارب كل يوم جرب شي جديد لاتعيش نمط حياة واحد لا تضيق على نفسك في بيئة أو أشخاص محددين 



حتى في المشاريع  التجارية يكون في مشروع ناجح لشخص عندة شغف تعب كافح قدر يحط لة بصمة ويتميز ماحاول يقلد إبتكر قدم شي جديد لمجتمعة ، وشخص مشروعة كان تقليد قدم شي مألوف عادي .. فكرتة تشوفها في اي مكان مالة بصمة خاصة



 تتوقع ايش الفرق بينهم ؟ 

و كيف بتكون مشاريعهم ؟

الأول بيكون لة سمعة وصيت في مجال عملة بحكم انه كان يحس بشغف إتجاة عملة وقدر يتميز فية🎈✨


غير عن التاني الي بيقفل مشروعة بعد فترة لأنة أصلا ماسواة إلا عشان يشوف إذا بتجية فلوس منة أو لا وبيفتح ويقفل وكذا بتكون حالتة لأنة مايحس بشغف إتجاة عملة 


ونشوف دا الشي حالياً في مشاريع الإنستقرام كيف كثرت ، والمشاريع إلي تميزت وقدرت تحط لها بصمة إنتشرت ونفتح لها باب رزق 



أصلا لما تدخل مجال عمل فريد بيكون مالك منافسين كثير وبيسهل عليك الطريق مو زي لما يكون في ١٠٠ شخص زيك وبنفس فكرتك 



ومن المشاريع إلي أحسها متميزة ولها بصمة وهاذي حساباتهم على الإنستقرام
Florist_sa
Ghadeeralmoeili  

وفي كتاب يتكلم عن نفس الفكرة اسمة كتاب المحيط الأزرق

مالقيت منة نسخة مترجمة 



وفي الأخير هاذي حياتك إنت ، إنت تختار طريقة حياتك وكيف بتعيش والمهم انك تنبسط بالتفاصيل مولازم تكون مُبْهر المهم تكون راضي قنوع سعيد 

أتمنى لكم يوم جميلاً وحياة سعيدة 🕊💕   
 

Makeover my room💕

السلام عليكم.

هذه التدوينة إن شاء الله راح تفيد الناس إلى ناوين يغيروا ديكور غرفهم أو بيوتهم، أو مهتمين بالديكور بشكل عام🏠 

إن شاء الله بوريكم ديكور غرفتي كيف كان قبل وكيف سار بعد وأيش بعض الأشياء إلى ساعدتني  في تجميع أفكاري، وبتكلم عن بعض المفاهيم المنتشرة في مجتمعنا. 

في البداية لمى فكرت إني أزبط غرفتي كنت أروح أدور في حسابات البنات في السوشيال ميديا واستنتجت ن أغلب البنات نفس الستايل نفس السرير حق ايكيا نفس بعض نفس الأفكار كأنهم نسخ من بعض!😐😐

 معقول ولا وحدة حاولت تبتكر في غرفتها وتسوي شي يعبر عن شخصيتها واهتمامها إلى من رحم ربي، فحاولت اجمع لكم كم شي أفادني ..

كنت دائمًا أتفرج على مقاطع اليوتوب (makeover) ياخدوا بيت أو غرفة ويغيروها ويورونا كيف كانت قبل وكيف سارت بعد ومن فين أشتروا الأشياء وأسعارها مرة استفدت منها وبتتعلمي أساسيات الديكور بشكل عام عشان تقدري تسوي الغرفة على أساسها بشكل صحيح👍🏻.


(Pinterest) تطبيق بطل بطل بشكل مرة حبيتة بيفيدك في أي موضوع إنتي مهتمة فية أكتبية في البحث ويجمع لك صور كثير وأفكار وتجارب وبعض الأحيان تلقينهم كاتبين تعليقهم عن الشيء مرة أفادني أنصحكم تحملونه وبقوة💗.

وحسابات الأجانب أحسهم مبدعين مجانين يبتكروا يسوا أشياء مرة ماتخطر على البال 🤔

من أهم الأشياء إلى لازم تسويها إنك تخلي الغرفة مو تقليد لأحد مو نسخة عن شي عجبك وخلاص صح ناخد بعض الأفكار إلى تلهمنا وتساعدنا بس لازم نحط لمساتنا الخاصة فيها والستايل إلى إنتي تحبية 💗💅🏻

طيب كيف أعرف الستايل إلى انا أحبة؟ 
أنك تتفرجي على صور أو فديوهات ديكور مرة كثير عشان تكتشفي النوع إلى تحبية في التصميم ويكون تغذية بصرية ليكي وأيش عجبك وأيش لا. 
بعض الأشخاص دايما مبدئهم إنهم يقدموا لناس الأفضل ويعطوا لنفسهم الأسواء والشي الجديد يكون لناس والقديم ليهم طيب ليش؟

 لدرجة في مرة وحدة جات غرفتي تقول شيلي الفرشة ولمى يجو ضيوف حطيها عشان ماتتوسخ 😳😳😐

طيب أنا مسوية الغرفة عشان الناس ولا عشان نفسي شي عجيب والله ولا وحدة تقول ليش ازبط غرفتي وماحد يجلس فيها غيري.

 ليش طيب نفسك ماتستاهل انها تجلس في مكان مرتب يفتح النفس ولا بس الناس يستاهلو ؟ 

مرة شي غلط نفسك تستاهل إنك تقدمى ليها الأفضل في كل شي💕

 حتى لو بمبلغ بسيط مايحتاج الأغلى لا عادي حتى لو تشتري ستارة، مفرش سرير، لوحة ،أشياء بسيطة تغير نفسيتك أولًا والمكان تانيًا 

لاتقولي ماعندي فلوس ماقدر يمديكي تاخدي الأشياء وتسوي لها إعادة تأهيل أنا سويت زي كذا وإن شاء الله بنزل تدوينه عن هذا الموضوع.
المهم طولت عليكم هذا شكل غرفتي قبل التزبيط

معليش على دا المنظر بس أوريكم مدى خياسة الغرفة😂😂 عشان محد ييأس من غرفتة💪🏻



  1. ونجي للجزء الحماس شكل الغرفة بعد 💕💕💕💕💘💘اتمنى تكونوا إستفدتوا من التدوينة ✨💗

 💕💕✨

السلام عليكم .. أول تدوينه في مدونتي ولله الحمد 

إن شاء الله مدونتي بتكون متنوعة تتكلم عن كل المواضيع الي أنا أهتم فيها يعني مو مخصصاتها بمجال معين ، وبتكون بالعامية عشان تكون خفيفة عليكم . 

الشي إلي خلاني أفكر أفتح المدونة إني أحب أشوف يوميات الأشخاص وكيف طريقة حياتهم وإهتماماتهم و طريقة تفكيرهم ، أشوف كل شخص أيش الشي الي حلو فية و أحاول إني أبداء أمارسة في حياتي اذا حسيتة مناسب ليا طبعًا ، من هنا قررت أنا كمان أشاركم طريقة حياتي البسيطة يمكن كمان تستفيدوا مني؟ و إن شاء الله تنبسطوا معايا ❤️.